Kur unë mendoj për artin, mendoj për të bukurën. E bukura është misteri i jetës. E bukura nuk është tek syri, por tek mendja. Në mendjen tonë ka një vetëdije për përsosmërinë. – Agnes Martin
Ne i përgjigjemi të bukurës me emocion. E bukura na dërgon mesazhe. Ne hutohemi nga këto mesazhe për shkak të shpërqëndrimeve që ato i shkaktojnë mendjes sonë. Këto mesazhe flasin rreth llojeve të ndryshme të lumturisë dhe të gëzimit. Gëzimi përfaqësohet në mënyrë të suksesshme nga Simfonia e Nëntë e Beethoven-it dhe nga Partenoni. – Agnes Martin
Të gjitha veprat e artit janë për të bukurën; të gjitha veprat pozitive e përfaqësojnë të bukurën dhe e ngrenë atë lart. I gjithë arti negativ proteston kundër mungesës së të bukurës në jetët tona. Kur vdes një trandafil i bukur, e bukura nuk vdes sepse ajo nuk është tek trëndafili. E bukura është një vetëdije e mendjes. E bukura është një përgjigje mendore dhe emocionale që ne bëjmë. Ne i përgjigjemi jetës sikur ajo të ishte e përsosur. Kur ne shkojmë në një pyll, ne nuk shikojmë pemët e kalbura të rëna. Ne frymëzohemi nga një shumësi pemësh që janë në këmbë. Ne madje dëgjojmë një heshjte kur ajo nuk është me të vërtetë e heshtur. Kur ne shikojmë një bebe të sapolindur ne themi se ai është i bukur, i përsosur. – Agnes Martin
Qëllimi i jetës është lumturia dhe ne i përgjigjemi jetës sikur ajo të ishte e përsosur, sikur ajo të ishte rruga e lumturisë. – Agnes Martin
Nuk është në natyrën e artistit që të shqetësohet për jetën, që të ndjehet përgjegjës për krijimin e një bote më të mirë. Ky është një shpërqëndim shumë serioz. E gjithë gjendja juaj drejtohet nga të jetuarit intelektual. Kjo është e padobishme në një vepër arti. E gjithë dija njerëzore është e padobishme në një vepër arti. Konceptet, marrëdhëniet, kategoritë, klasifikimet, deduktimet janë shpërqëndrime të mendjes që ne dëshirojmë ta çlirojmë nga frymëzimi. – Agnes Martin
Ka dy pjesë të mendjes. Mendja e jashtme regjistron faktet dhe mendja e brendshme thotë “po” dhe “jo”. Kur mendoni për diçka që duhet të bëni, mendja e brendshme thotë “po” dhe ju ndjeheni të ngazëllyer. Ne e quajmë këtë frymëzim. – Agnes Martin
Për një artist kjo ishte e vetmja mënyrë. Asgjë nuk mund ta ndihmojë atë. Ai duhet të dëgjojë vetë mendjen e tij. Kjo është rruga e dorëzimit. Ai duhet t’i dorëzohet vetë mendjes së tij. – Agnes Martin
Përzgjodhi dhe përktheu Enkeleda Suti.